Цөмийн онош зүйн тасаг

БИДНИЙ ЭРХЭМ ЗОРИЛГО

Эрүүл мэндийн салбарт цөмийн анагаах ухаанд суурилсан эмчилгээ, оношилгоог дэлхийн хөгжилтэй орны түвшинд ойртуулж, орчин үеийн өндөр техник-технологи нэвтрүүлсэн чадварлаг багаас бүрдсэн үндэсний төв болох

Зорилтууд

1. Оношилгоо, эмчилгээний төрлүүдийг олшруулах, чанарыг сайжруулах ялангуяа хорт хавдрын эмчилгээний тоог олшруулах
2. Олон Улсын Техник Хамтын ажиллагааны төслийг хэрэгжүүлэх, Аппарат, тоног төхөөрөмжийг шинэчлэх
3. Тасгийн орон тоог нэмэгдүүлэх, боловсон хүчний сургалтын менежментийг сайжруулах
4. Тасгийн эмч нарын эрдэм шинжилгээ судалгааны ажлыг сайжруулж, гадаад сургалт зохион байгуулах, оношилгоо эмчилгээний стандарт, удирдамжуудыг гаргах

Тасгийн үйл ажиллагааны товч танилцуулга:

Улсын Клиникийн Төв Эмнэлгийн Цөмийн онош зүйн тасаг нь 1975 оны 3 сарын 31-нд Монгол Улсын Эрүүлийг хамгаалах Яамны сайдын тушаалаар “Цөмийн онош зүйн лаборатори” нэртэйгээр анх байгуулагдсан. Энэ нь Монгол улсын хувьд анагаах ухааны салбарт цөмийн технологийг нэвтрүүлсэн анхны тулгын чулуу болсон юм.

Тус цөмийн онош зүйн лабораторийг санаачлан удирдан зохион байгуулсан хүн бол Арьдчилсан Герман улсад хүний эмчийн мэргэжил эзэмшсэн Монгол Улсын Ардын эмч, Хүний Гавьяат эмч, Анагаахын Шинжлэх Ухааны доктор, профессор Пэлжээгийн Онхуудай билээ.

Цөмийн анагаах ухаан нь дүрслэх оношилгооны нэг салбар бөгөөд эмгэг процессыг эсийн болон молекулын төвшинд оношилхоос гадна нэг шинжилгээний аргаар авах боломжгүй бүтцийн болон үйл ажиллагааны мэдээллийг нэгэн зэрэг өөр өөр дүрслэлээс гарган авах боломжтой, оношилгооны зөрүү гарах эрсдэлийг бууруулсан, өвчин эмгэгийг эрт илрүүлж эмчлэх, өвчтөний эмчилгээний менежментийг зөв сонгох, өвчтөнийг бүрэн эдгэрэхэд туслах төдийгүй, бамбайн булчирхай болон, элэгний хорт хавдар, үе мөчний үрэвсэлт эмгэг, хавдрын хөнгөвчлөх эмчилгээнүүдийг цацраг идэвхт изотоп ашиглаж хийдэг салбар юм.

Одоо тус тасагт жилд ойролцоогоор 4500 өвчтөнд SPECT болон SPECT/CT аппаратаар бөөр, яс, бамбай, зүрх, уушиг, элэг цөс зэрэг эрхтэн тогтолцооны үйл ажиллагааны оношилгоо, 9800 бамбайн даавар болон хавдрын маркер тодорхойлох шинжилгээг хийж, мөн бамбайн булчирхайн хордлогот бахуу, хорт хавдрын эмчилгээг 350 гаруй өвчтөнд хийж байна.

Тус тасаг 1982 оноос Олон Улсын Атомын Энергийн Агентлаг /ОУАЭА/ -ын Техник Хамтын Ажиллагааны төслийг хэрэгжүүлж, анагаах ухааны практикт цөмийн технологийг амжилттай нэвтрүүлж ирсэн туршлагатай билээ. Өнгөрсөн 42 жилийн хугацаанд тасагт 4 удаа технологийн шинэчлэл хийгдсэн байдаг.

1982-2010 оны хугацаанд уг төслийн хүрээнд 1,8 сая гаруй долларын тоног төхөөрөмж авсан бөгөөд зарим хэрэгцээт изотоп, холбогчууд, радиоиммунологийн оношлуураар хангагдаж, хүний нөөцөө сургаж, олон улсын экспертүүдийг урьж суралцаж ирсэн.

Хамгийн сүүлийн технологийн шинэчлэлийн хүрээнд 2012-2015 оны төслийн хүрээнд ОУАЭА болон МУ-ын засгийн газрын хамтарсан санхүүжилтээр 651,500 еврогийн 2 толгойт SPECT/СТ дижитал гамма камер авч суурилуулан, Монгол улсын дүрслэх оношилгооны салбарт анхны Хосолмол технологийг нэвтрүүлсэн билээ.

Энэхүү дэвшилтэт орчин үеийн хосолмол SPECT/СТ аппаратыг суурилуулсанаар оношилгоо, эмчилгээний түвшин нэг шатаар дээшилж эмгэг процессыг эсийн болон молекулын түвшинд оношилох, нэг шинжилгээний аргаар авах боломжгүй бүтцийн болон үйл ажиллагааны мэдээллийг нэгэн зэрэг өөр өөр дүрслэлээс гарган авах боломжтой болж оношилгооны зөрүү гарах эрсдэлийг бууруулсан төдийгүй дараах оношилгоо, эмчилгээний аргачлалуудыг шинээр хийх боломжтой болно.