УЛСЫН НЭГДҮГЭЭР ТӨВ ЭМНЭЛЭГ НЬ БҮГД НАЙРАМДАХ СОЛОНГОС УЛСЫН “ДОНГ-А” ИХ СУРГУУЛИЙН ЭМНЭЛЭГТЭЙ ХАМТРАН АЖИЛЛАХААР БОЛЛОО.

Улсын Нэгдүгээр Төв эмнэлгийн Ерөнхий захирал, Анагаах ухааны доктор Л.Бямбасүрэн БНСУ-ын Донг-А Их Сургуулийн эмнэлгийн удирдлагуудыг 2024 оны 10 дугаар сарын 08-ны өдөр хүлээн авч уулзан “Хамтын ажиллагааны санамж бичиг”-т гарын үсэг зурлаа.

Уулзалтад УНТЭ-ийн Эмнэлзүй эрхэлсэн дэд захирал О.Баярмаа, Төлөвлөлт үйл ажиллагаа эрхэлсэн дэд захирал О.Чойдог, Нүд судлал, мэс заслын тасгийн эрхлэгч С.Энхтуул, их эмч Д.Наранцэцэг, СЭШХАА-ны гадаад харилцааны мэргэжилтэн А.Гэрэлтуяа, Донг-А Их Сургуулийн эмнэлгийг төлөөлж эмнэлгийн ерөнхийлөгч Анн Хи Бэ, Нэгдүгээр эмнэлзүйн төвийн дарга Сунг Ёнг Жин, Олон улсын төвийн дарга Ванг Ли, Олон улсын төвийн менежер Ли Мин Жэ, Бусан хотын эрүүл мэндийн аялал жуулчлалын төвийн гүйцэтгэх захирал Чой Жэ Ёнг нар байлцлаа.

Донг-А их сургуулийн эмнэлэг нь БНСУ-ын хоёр дахь том хот болох Бусаны төлөөлөл хувийн их сургуулийн нэгдсэн эмнэлэг бөгөөд Донг-А их сургуулийн үүсгэн байгуулагчийн үндсэн үзэл баримтлал болон БНСУ-ын эмнэлгийн боловсролын бодлогоос улбаалан хайрлах сэтгэл, мөн дэвшилтэт эмнэлгийн технологиор боловсон хүчин бэлтгэх нийт хүн амын эрүүл мэнд, сайн сайхны төлөө сайн дурын үйлсийг манлайлж чадах эмнэлэг байх уриатайгаар ажиллаж байна.

Уулзалтаар хоёр тал нүдний мэс засал болон бусад мэргэжлийн чиглэлээр хамтран ажиллах, эмч мэргэжилтнүүд харилцан туршлага солилцох, зөвлөгөө өгөх, ажлын байран дээрх сургалт зохион байгуулах, сургалт судалгааны чиглэлээр болон сайн дурын үйл ажиллагаанд хамтран ажиллах юм.